Manuel Juan Francisco del Cristo de la Victoria Prieto Comesaña.

Comezou a súa andaina polo mundo da interpretación en 1982 coa curtametraxe "Tacón". Tempo despois deuse a coñecer pola súa aparición en varios programas de humor da TVG polos que acadou papeis en varios telefilmes e curtos de serie B. Porén, o grande salto á fama foi con "Airbag" no que atinxiu a que é a súa única nominación aos Goya polo de agora.

Despois alterna aparicións na grande pantalla como secundario de luxo en "Torrente, el brazo tonto de la ley", "Entre las piernas", "La mujer más fea del mundo", "Año Mariano" ou "El robo más grande jamás contado" con papeis en series de televisión como "Manolito Gafotas", "Cuéntame cómo pasó", "Moncloa ¿dígame?" ou "Era visto". Grande actor cómico, desborda carisma en filmes como "Lobos de Arga", "Rey gitano", "Neckan" ou "Miau" entre outras.